Phir Kab Aaogay Poetry By Sainee Raj
Sard, garm, gila
Mausam ka rukh badla
Bikhre waadon ko maine kas kar pakda
Dard ne maazi se yaade udhaar mangawayi
Neele aasmaan mein chaand ne apni shakl dikhayi
Par tum na aaye...
Saal sadiyon se lambi lage
Aankhen jali intzaar karte-karte Jhurriyon ne hothon ke kareeb angdai li
Haathon ki rekhaon ne bhi apna raasta badla
Par tum na aaye...
Makaan ki deevaaron par papdi ne nakshe banaaye
Maanon jaise mere kayi raaj inme dafan ho
Jaalon se pankhon ka wajan kuchh aur badha
Hawa bhi kayi dafe khidki khol ke aa gayi
Par tum na aaye...
Phir waqt ne aisa khel khela
Dard bhi dukh dukh kar thak gaya
Girkar sambhalna humne bhi seekh liya
Aur ek din achaanak...
Tum aa gaye..!!
Birha ki raaton ne dekha
mej par pade bakse mein se 16 shringaaron ne aawaaj lagayi
Dil maano halak tak ki sair par nikal pada ho
Is martba jaane kya tabaahi machaaoge
Ab aa hi gaye ho to ghar ke andar nahin aaoge?
Suji aankhon se tumhaara deedaar kiya
Tum ek baar pyaar se dekh lo ye intzaar kiya
Harfo ne lafzon ka saath yoon chhoda ki jo jumle maine taiyaar kiye the
Ki ek din tum par barsaaungi
Tum sunoge aur main sunaaungi
Ladungi, tumhen noch khaungi
Aur phir jab thak kar haar jaungi
Tab tumhen ashkon se apne kisse sunaungi
Wo jumle jabaan par hi chipak gaye
Ab tum saamne ho aur alfaaz mujhse bahut door
Aankhon mein nami hai
Aag donon taraf lagi hai
Main ab bhi naraazgi ka daaman thaamen baithi hoon
Tumne ab tak joote nahin utaare
Is baar to ruk ke jaoge
Bataao phir kab aaogey?
0 Comments